Lendo "Maus" de Art Spiegelman...

A novela gráfica que estamos a ler, Maus, ten como subtítulo “relato de un superviviente”. A conta deste subtítulo, comezamos a última reunión do clube de lectura de banda deseñada cunha frase do filósofo F. Nietzsche: “Aquel que ten un por que para vivir pode enfrontarse a todos os comos”.

Foi moi interesante comentar as razóns polas que a algunhas compañeiras non lles está a encher a obra de Art Spiegelman, a lo menos de momento. Non obstante, a maioría si lles gustou. De momento, o que as chicas do clube de lectura resaltan da novela gráfica é: a sinceridade coa que conta o autor a relación co seu pai, non sempre boa; o trato ás mulleres naquela época; a claridade coa que o autor explica a necesidade de atopar temas para logo expresar na banda deseñada; a portada do libro na que o gato parécese a Hitler, en especial polo tipo de bigote... Resulta enriquecedor ver como compartindo as nosas experiencias de lectura aprendemos cousas das que antes non nos decataramos...

A foto é dunha exposición itinerante sobre Maus na que se resalta o trasfondo e orixinalidade da obra.

As duras críticas á sociedade: MALES de CABEZA

Esta mañá tivemos o terceiro encontro arredor do libro de Fran Alonso "Males de cabeza"; hoxe correspondíanos "Círculo vicioso", "Economía de guerra" e "Coma vostede e coma min".
O primeiro relato levounos ao mundo do futbol: a Marta non lle gustou nada polo tema pero recoñeceu que é un feito do que todos falan e que está de modo entre homes e mulleres de todas as idades; daí pasamos a falar do poder económico da industria do fútbol e de como este deporte nos pode illar doutros temas como a realidade política e económica do país.
Do segundo relato comentaron que está á orde do día, son moitas as persoas que se deixan levar por un consumismo compulsivo e non controlan a súa economia.
No terceiro reflexionamos sobre o trato que se lle dá aos animais, tan diferente: ou os maltratan ou os visten e coidan coma as persoas (falamos dos prezos dos traxes dos cans en Adolfo Domínguez, por exemplo); non reflexionaran sobre como a protagonista trata á súa criada, peor cós cans, chega a aconsellala que se prive da comida para darlla aos cans.
Sobre os fragmentos de "A tolemia é un sombreiro" continúan desconcertadas, din : xa se verá en que acaba isto...

Conclúen en que a obra lles está a dar unha crítica visión da sociedade actual...

CONTINUAREMOS................................

A escritora ROSA ANEIROS cos clubes de lectura

View all

Get your own

Onte recibimos no noso centro á escritora Rosa Aneiros, despois da súa conferencia tivemos o pracer de recibila na nosa biblioteca e os alumn@s do club de lectura puideron falar con ela e facerlle moitas preguntas sobre a súa profesión, as súas obras, etc e contestou a todas elas con toda amabilidade.

Imos ler Maus, a novela gráfica de Art Spiegelman!

En efecto este trimestre imos ler Maus, obra que recibiu o premio Pulitzer e que deu lugar a unha exposición no Museo de Arte Moderno de Nova York. Hoxe fixemos unha reunión para presentar esta obra.

As citas na reunión desta mañá foron:

-“Todos temos un segredo escondido baixo chave no ático da alma” Carlos Ruiz Zafón

-“Para cambiar o mundo comeza por cambiarte a ti mesmo” Alejandro Jodorowsky

Desexando que as compañeiras do clube de lectura disfruten da lectura e de compartir a mesma nas nosas reunións, déixovos coas palabras de Umberto Eco que aparecen na contraportada da novela gráfica Maus:

"O certo é que Maus é un libro que non se pode deixar de ler, nin sequera para ir durmir. Cando dous ratos falan de amor, conmóvente; cando sufren, choras. Pouco a pouco, a través deste pequeno conto que inclúe sufrimento, humor e superar as probas da vida cotidiana, quedas cautivado pola linguaxe desta vella familia do Este de Europa e atrapado polo seu ritmo gradual e hipnótico. Cando rematas Maus da pena abandoar este mundo máxico..."

MALES DE CABEZA de FRAN ALONSO

O noso próximo libro de lectura é un libro de relatos: Males de cabeza do escritor Fran Alonso; consta de 20 relatos e máis o relato fragmentario A tolemia é un sombeiro, unha crúa visión da sociedade actual.

Léremolo en 4 sesións que abranguerán 3 relatos cada unha e as correspondentes partes do relato fragmentado:

1º) - Os aforros da vella, Desviación de chamada, Domesticum bellum, e máis as partes de "A tolemia..."

2º) - Círculo vicioso, Economía de guerra, Coma vostede e coma min, e máis as partes de "A tolemia..."

3º) - A señora Lola, Bartolo o tolo, Coma o pato Donald, e máis as partes...

4º) - 05 AM Vigo, Estou tolo, O fareiro, Do noso correspondente, e máis as partes... ata o final

De certo que estes relatos nos darán para máis dun debate.

CONCLUSIÓNS A "O ÚNICO QUE QUEDA É O AMOR"

Esta mañá tivemos o encontro para falar das conclusións que os alumnos elaboraron trala lectura de "O único que queda é o amor":
Todos eles coincidiron en que o relato do que máis gustaron é o primeiro, Un radiante silencio, por que conta unha historia que a todos eles lles gustaría vivir -recoñecen que no fondo son uns románticos - e que lles parece moi realista; para eles ten un toque de intriga que os mantén en vilo ata o remate. Só unha alumna discrepa e escolle como mellor relato Unha estraña lucidez pola orixinalidade de que o narrador sexa un can.
Coinciden en afirmar que para que o autor puidera escribir un libro sobre o amor coma este ten que estar namorado ou ter vivido un gran amor; pensan que el escribiu esta obra por que necesitaba compatir os seus sentimentos.
Engaden que é un libro moi ben escrito, cunha linguaxe clara e directa, que non lles causou dificultades o que valoran como algo moi positivo.
Conclúen que é un libro que lles recomendarían aos seus compañeiros e mesmo aos seus pais.

Recomendacións de lectura de NADAL

NADAL e RECICLAXE

A HISTORIA DOS VAMPIROS E DOS ZOMBIES NO CLUBE DE BANDA DESEÑADA

Nesta última sesión do clube de lectura de banda deseñada a discusión sobre a obra de Victoria Francés levounos a falar sobre a orixe da lenda dos vampiros e dos zombis. Comentamos a súa historia, as personaxes históricas nas que se basean obras literarias de vampiros... Dialogamos sobre a posibilidade de que o mito vampírico sexa un invento noso para expresar o noso lado salvaxe, para representar medos humanos (como o medo a morte) e para expresar a fascinación pola inmortalidade.
Nesta sesión aproveitamos para expresar a nosa opinión sobre todos estes aspectos. Empezamos cunha famosa cita de Nietzsche que permite múltiples interpretacións: Alí onde radican as nosas debilidades van a extraviarse as nosas exaltacións. E rematamos
cunha canción de Alaska dos anos 80 moi divertida que podedes ver aquí.

EN BANDA DESEÑADA COMEZAMOS LENDO MISTY CIRCUS

En efecto o clube de lectura de banda deseñada arranca o curso lendo Misty Circus de Victoria Francés. Esta autora está a ser todo un fenómeno de masas, mostra diso foi o enorme furor que causou no último Salón Internacional do Cómic de Barcelona de 2009.
En xeral a obra gustou, non obstante todos os alumnos desexan ler a segunda parte deste libro, xa que a historia que Victoria nos conta aínda non chegou ao desenlace...
Posto que Victoria Francés destaca polas súas ilustracións inauguramos ás nosas reunións cunha fermosa cita de Pablo Picasso que fai refencia a arte: "A ARTE É UNHA MENTIRA QUE NOS PERMITE COÑECER A VERDADE".

Este ano o grupo do clube de lectura é máis numeroso ca o ano pasado: BENVIDA AOS NOVOS! Desexamos que disfrutedes lendo os cómics e que o pasedes moi ben nas nosas reunións.